香港天主教教堂結婚行禮經驗分享

最近發現原來有關日本和服婚攝的Blog瀏覽人數很多！雖然已經是一年前寫的文章，仍然希望真的可以幫到大家啦～

今次想分享我的教堂安排～話說大爺係天主教徒而我並無宗教信仰，幾可肯定會在教堂行禮！所以一著手處理所有婚禮事項就積極搵資料！可惜網上資訊唔算好完整，又有好多事都係去到實際面對先知，希望打返個全紀錄，可以紀念下自己的心血之餘，又可以分享俾大家～

＊以下資料在2014年～2016年1月搜集，未能確保為最新版本，詳情請向相熟堂區/ 教堂職員確認。

假如你都想在在天主教教堂行禮，首先要了解下列嘅條件/ 流程：
1. 單方或者雙方本身為天主教徒，有領洗紙
2. [婚禮前12個月] 完成婚前輔導課程
3. [婚禮前6個月]  預約教堂（付訂金，視察，確認細節，綵排等）
4. [婚禮前3個月] 更新領洗紙
5. 去婚姻登記處申請「婚姻登記官證明書」（簡稱教堂紙）
6. 見神父完成婚前查詢
7. 邀請神父主持婚禮
8. 場地佈置場刊印刷等等
9. 行禮啦～～～

於婚姻登記處領取教堂紙。同樣有有效期，係3個月。
程序都唔少，但係一個好神聖好獨特嘅回憶。（尤其對無信仰＋本來打算去紅棉道就算的我…)
天主教香港教區提供的教友結婚須知請按此

天主教教徒身份
想當然爾，最少一個要係教徒。（如果雙方都唔係可以試下伯大尼等無宗教信仰教堂）天主教比基督教寬容少少，容許另一半為非教徒。但原來唔係話受洗咗就得咁簡單，受洗之後仲有個步驟叫領堅振(Confirmation)，類似係你大個咗之後都要表明心志係信主嘅。原則上係要領埋堅振嘅教徒先可以行禮，雖然並非必需，但部份教堂如聖瑪加利大堂會跟你說領了堅振較好，而聖德肋撒堂會跟你說並無明文規定領堅振是必需的，事前還是向各個堂區查詢一下較好。
(大爺按: 根據小弟在慕道班的導師所說，只要你已領洗為教徒，不管你是否已領堅振，作為教徒已有權利使用教堂進行禮儀聖事，不過仍建議先向預約堂區再三確認較好。)　　
當然如果你係教徒你會知，你唔係嘅話你另一半都(應該要) 會知，所以都唔算一個好麻煩嘅程序。
真實情況係大爺原來未領堅振！而領堅振係要上長達年半嘅慕道班，只要上返堂領返堅振就ok，中途插班都無問題！

婚配聖事小知識:
天主教的婚配聖事 (即是行禮) 有分以下三式 (有關三式嘅內容可以參考這裡)
第一式: 雙方都係天主教徒，要舉行彌撒，儀式大約要個半鐘，要唱多d詩歌
第二式: 一方係天主教徒，一方係基督徒，都要舉行彌撒
第三式: 一方係天主教徒，一方係非教徒。唔使彌撒唔使領聖體，無咁多詩歌同讀經。儀式大概40分鐘

教友婚前輔導課程
如果有做過下資料搜集，就會知道不論天主教定基督教都會要求一對新人完成咗婚前輔導課程。原本以為天主教會同基督教一樣係一對一同神父傾計上堂咁，不過原來天主教只係上一個有十幾對新人一齊上嘅2日半課程就得！

舉辦課程嘅有香港明愛家庭服務同香港公教婚姻輔導會CMAC，我地就揀咗CMAC，純粹因為多d時間揀！
課程分兩日進行另加一個晚上大約2個小時嘅課堂。主要係由義務導師分享佢地嘅婚姻生活，講下夫妻相處之道，分析下原生家庭，食下茶點傾下計。
對於非教徒嘅我來說，呢個course唔會令你覺得唔舒服或者好hard sell 信仰，只係其中一節會邀請大家一齊望彌撒可能會唔太習慣。不過還好啦，只係唔識唱歌唔知幾時祈禱同跟唔到個程序 lol 但為咗同另一半行教堂，都要學定㗎！剩低果2個小時嘅夜晚課堂會講關於兩性關係，唔深入嘅所以唔需要難為情。

成個課程唔會有太多要喺大家面前發表偉論嘅機會，怕羞都唔驚，因為唔係考試係無唔合格嘅 XD
課程內容雖然重要，但最重要最重要最重要係張証書！因為根據教區規定，所有教徒結婚前一定要上婚前輔導課程，而預約教堂時係要提交証書的，否則就唔可以於教堂行禮!（未上可以後補但一定要有。）
呢個課程嘅証書無時限嘅，所以一開始就可以揀個得閒d嘅時間上咗先～

預約教堂
呢個可能係成個過程最緊要最緊張嘅一環。係人都知香港地咩都要鬥快，book 教堂都好驚book 唔到（雖則教堂已經唔算難，但想要自己心水時段同地點都會緊張嘛）。首先要知道教堂幾時開始接受預約，到時到候打去。以下列出幾個熱門教堂嘅資料：
尖沙咀玫瑰堂：1年半前接受入紙申請抽籤，自己堂區教友優先。因為唔係果個堂區同埋唔喜歡抽籤所以都無考慮。
堅道聖母無原罪主教座堂：9個月前接受預約，星期六可選時段為10:00及11:00 ，假日不開放。唔係你預約嘅時段就無得影相，除非book多個鐘。原本想去堅道大堂嘅，不過時段唔靚而且完咗自己果節無得喺門口影相，所以無考慮。
聖德肋撒堂：1年前接受預約，星期六可選時段為10:00,、11:00、12:00 及 13:00。只可預約1個小時，之後可以於教堂外影相，亦無明文規定教友需已領堅振。可以算是flexible嘅一間，但因為同晚宴場地唔順路所以不得不放棄。
聖瑪加利大堂：1年前接受預約，星期六可選時段為10:00、11:00、14:30、15:30 及 16:30。下午時段需視乎教堂有無活動，同樣自己堂區教友優先。因為rundown問題需要選下午時段行禮，加上比較近晚宴場地，所以最後選擇了聖瑪加利大堂！

建議大家可以打電話去各聖堂問清楚最新細節，職員多數好友善～

最核心嘅問題，到底點book 呢？
教堂於婚期一年前當月的第一個工作天上午9時開始接受電話預約，以我地當時想book 16年1月嘅聖瑪加利大堂為例，我倆要於2015年1月2號（該月第一個工作天）上午9時開始打電話預約，所以較啱個鐘9點打去，簡單留低聯絡及結婚雙方資料以及婚期同埋希望行禮嘅時段，等堂區負責同事打返嚟確認就可以啦！過程不過兩分鐘 (如果電話打得通嘅話…)。 之後於一個月內到堂區交訂金並填返資料就可以一直等到差不多婚禮前1-2個月再去確認細節及交尾數。
到結婚前一個月，教堂會集合所有同月結婚嘅新人進行綵排，歡迎新人帶同父母伴郎伴娘一同出席。進行綵排時會講解婚禮當日流程、企位同埋其他要注意嘅細節，大概1至1.5個小時。跟住再需要去教堂就係大婚當日啦！

更新領洗紙
教徒的話需要在婚禮6個月前到自己領洗嘅堂區更新領洗紙。領洗紙會清楚列明無婚配記錄以及是否己領堅振聖事。領洗紙需要連同教堂紙一齊交俾所屬堂區，堂區就會幫你處理同預約見神父啦～

申請擬結婚通知書「婚姻登記官證明書」（簡稱教堂紙）
呢個item 嘅對手係婚姻登記處，好簡單。因為去教堂行堂唔使三個月前爭註冊處時段，於是只要於婚禮三個月至15日前上網填資料約時間，喺預約時間兩個或者其中一個上去俾錢宣誓就可以。呢個過程叫做向婚姻登記官遞交擬結婚通知書。通知書會向公眾展示15天，如果無人反對的話 (其實唔知過去有無實例)，兩星期後就可以拎住收據去拎張婚姻登記官證明書。如果去俾錢果次係其中一方，拎果時就要係另一位，又或者兩個人兩次都一齊去都可以。註冊處方面需要見過兩位真人，並各自宣誓。
要留意嘅係個人資料唔好填錯，因為結婚証書會跟呢張通知書嘅資料出，而結婚証書嘅任何資料係無得改嘅。所以金睛火眼睇清楚中文名筆劃啱唔啱等等。

見神父完成婚前查詢
呢個環節係上完婚前輔導之後，拎埋婚姻登記官證明書之後處理。
當你去自己堂區交哂資料（教堂紙、領洗紙及婚前輔導課程證書）之後，堂區職員會幫你約堂區神父，主要目的係等堂區神父認識下你地，分享下婚姻觀，睇下神父係咪同意你地已經準備好結為夫婦。唔同神父會問唔同嘢，所以都無咩可以參考。最後神父問完問題就會喺張form上面剔剔剔，我地簽返個名就ok！

★溫馨提醒，天主係希望我地生兒育女嘅★

搵神父主持婚禮
呢個點係我地無為意導致有少少驚險嘅！一直以為如果無特別指定的話，所屬堂區會幫你安排，但原來唔係㗎！你一定要自己邀請一個神父，唔係就無．人．主．持婚禮啦！我地係喺見堂區神父做婚前查詢嘅時候先知道嘅！果下即刻好慌張(￣▽￣)／(你諗下果時得返唔夠3個月…)
好彩透過慕道班搵到本身係聖瑪加利大堂嘅關神父，即刻鬆一口氣！原來神父係好忙，好多職務，所以都要盡早邀請！

場地，印刷
場地佈置方面，其實教堂好多嘢都唔俾做。以聖瑪加利大堂為例，唔可以點蠟燭、拋花瓣、掛氣球、帶寵物等等。簡單嚟講係除咗reception table咩都唔做得。不過教堂一日做幾場婚禮又有彌撒，如果整污糟整亂咗的確係好麻煩。
雖然佈置上無彈性，但相對地教堂提供咗好多資源，例如門口花鐘、紅地毯、通道兩旁花球、畫架、reception table（無枱布）、羽毛筆、小小新娘房及4個車位。所以我地搵咗間可以自己DIY佈置嘅佈置公司提供配件搵兄弟姊妹去到自己擺好就得。唔使派人嚟準備又可以減低成本。

講多少少聖瑪加利大堂嘅配套，其實係好少…首先車位只有4個，可以泊到大概2個小時，如果需要更多可以泊近馬場街位，可以旅遊巴落完客即走，或者泊28座一架用兩個位。新娘房係教堂隔離一間房仔，有鏡但最好唔好預可以換衫換妝，因為可以利用嘅時間只係你果場開始之前30分鐘。我就係換好婚紗先去教堂，只係補少少妝就行禮！想當時冷氣又大又緊張，成日唯一得自己獨處嘅5分鐘，全程個人好震。

印刷呢方面我地係完全skip咗😂好多人希望personalized 本場刊，有自己個名有自己張相有自己大日子印哂上去。不過我地行第三式，時間好短同埋如果賓客唔拎走留返喺個位度會傷心嘅關係(實情係唔想浪費紙張同金錢)，所以決定唔印，用返教堂果本。雖然唔係個人化，但慳返時間唔使設計同校對，用起上嚟都無分別。(我深信9成人都唔會打開黎睇)

司琴、詩歌班及領禱
呢個係optional，可有可無。如果因為各種原因唔想搵人彈，其實教堂可以幫你播CD！以我地第三式為例，只係三個位要音樂，進場、簽紙、退場。教堂有隻專用CD，大路嘅古典純音樂都有齊。如果你要播a thousands years 就肯定要自備啦。
至於我地幸運地有相熟做慣司琴嘅朋友仗義相助，所以係有司琴嘅。咁嘅話就要向教堂交form同司琴嘅証書。由於想留多d時間影相，所以無搵詩歌班啦。
最後就是領禱員，是否需要就要向主禮神父查詢，如關神父比較flexible可獨自處理整個流程的話則可有可無，否則就要自行找相屬的教友朋友處理。

如是者，要準備嘅大概都差不多啦！

當日我地都算順利完成，新郎無漏低戒指在家中，亦都無讀錯新娘個名。少少美中不足係落足一日雨，所以完咗自己session後無得出門口影，喺教堂裡面爭取影多兩張就急住交場俾下一組。(原本出面樓梯係好靚同必影位……) 不過學神父話齋，風雨同路，落雨又有咩好怕喎😎

延伸閱讀：尋找日本和服婚攝公司過程 + 東京 vs 京都和服婚攝大比併

如果喜歡我們的文章，歡迎關注Facebook專頁：Kappiwalker_拖住老婆遊世界！一齊分享旅遊心得，交流有用資訊！